Erdog‘an Netanyahu ishtirokidan so‘ng sammitni tark etdi
Turkiya prezidenti Rajab Toyyib Erdog‘anning samolyoti Misrning Sharm ash-Shayx shahriga yo‘l olganida, u yerda Isroil bosh vaziri Binyamin Netanyahu ham sammitda ishtirok etishi mumkinligi haqida ma’lumot olindi. Bu haqda Zamin.uz xabar berdi.
Bu xabardan so‘ng Erdog‘an samolyotni qo‘ndirmaslik haqida buyruq berdi. Ma’lumotlarga ko‘ra, Turkiya rahbari Misr prezidenti Abdulfattoh as-Sisiy va AQSh prezidenti Donald Trumpning taklifiga binoan G‘azo sektoridagi otishmalarni to‘xtatish bo‘yicha kelishuvni muhokama qilish uchun Misrga yo‘l olgan edi.
Parvoz davomida Erdog‘an shaxsan Sisiy bilan telefon orqali bog‘lanib, agar Netanyahu ham sammitda qatnashsa, samolyotni qo‘ndirmasligini bildirdi. Shu bilan birga, Anqara rasmiylari Vashington bilan ham aloqa qilib, bu haqda oldindan kelishuv bo‘lmagani uchun norozilik bildirdi.
Iroqning INA agentligi ma’lumotiga ko‘ra, Isroil bosh vazirining ishtirokini tashkil etishga AQSh prezidenti Donald Trump harakat qilgan, ammo bu urinish muvaffaqiyatsizlikka uchragan. Shuningdek, Iroq bosh vaziri Muhammad Shia as-Sudaniy ham agar Netanyahu sammitda qatnashsa, o‘zi ishtirok etmasligini oldindan ma’lum qilgan.
Natijada, Netanyahu AQSh va Isroil rasmiylari bilan maslahatlashgandan so‘ng safardan voz kechdi. Erdog‘anning samolyoti esa Netanyahu kelmasligi rasman tasdiqlanmaguncha havoda aylangan va shundan keyingina Sharm ash-Shayxga qo‘ngan.
Reuters xabariga ko‘ra, 13 oktabr kuni ertalab Netanyahu Isroilda Donald Trump bilan uchrashgan. Keyinchalik Misr tomoni Isroil bosh vazirining ehtimoliy ishtiroki haqida ma’lum qilgan, ammo bosh vazir idorasi yahudiy bayramlari sababli tashrifdan voz kechganini ma’lum qilgan.
Sammitda HAMAS vakillari ham ishtirok etmagan. Erdog‘anning bu qarori Turkiyaning Yaqin Sharqdagi diplomatik pozitsiyasini yana bir bor ko‘rsatdi.
Anqara Isroil bilan bir maydonda qatnashishdan voz kechishga tayyor ekanligini namoyon etdi. Bu holat Turkiyaning mintaqadagi siyosiy mavqeini aniq ifodalaydi.
