Tramp: Erdo‘g‘on Ukrainada mojaroni hal qila oladi
AQSH prezidenti Donald Tramp Turkiya rahbari Rajab Toyyib Erdo‘g‘on Ukrainadagi mojaroni hal etishda muhim rol o‘ynay oladi, deb hisoblaydi. Bu haqda Zamin.uz xabar berdi.
Tramp bu fikrini Sharm ash-Shayxdan Vashingtonga parvoz paytida jurnalistlarga ma’lum qildi. Prezidentdan “Erdo‘g‘on Ukraina mojaroini hal qilishga yordam bera oladimi?” deb so‘ralganda, u shubhasiz ravishda ijobiy javob berdi.
Trampning so‘zlariga ko‘ra, Erdo‘g‘on Rossiyada hurmatga ega va Rossiya prezidenti Vladimir Putin unga hurmat bilan qaraydi. Shuningdek, Tramp Putinni o‘z do‘sti sifatida ta’rifladi.
Eslatib o‘tish joizki, 13-oktyabr kuni Sharm ash-Shayx shahrida G‘azo sektoridagi mojaroni to‘xtatish maqsadida tinchlik sammiti o‘tkazildi. Ushbu sammitda Misr prezidenti Abdulfattoh as-Sisi, Qatar amiri Shayx Tamim bin Hamad Al Tani, AQSH prezidenti Donald Tramp hamda Turkiya prezidenti Rajab Toyyib Erdo‘g‘on ishtirok etdi.
Sammit yakunida G‘azo sektorida otishmani to‘xtatish va garovdagi barcha isroilliklarni ozod qilish bo‘yicha kelishuvga erishildi. Bu kelishuv mintaqadagi tinchlik va barqarorlikni ta’minlashga xizmat qilishi kutilmoqda.
