Qirg‘izistonda 17 yoshli qiz zo‘rlab o‘ldirildi
Qirg‘izistonda 17 yoshli qizga nisbatan sodir etilgan jiddiy jinoyat butun mamlakatni hayratga solmoqda. Bu haqda Zamin.uz xabar berdi.
Issiqko‘l viloyatining Yetti-O‘g‘uz tumani, Barskaun qishlog‘ida istiqomat qiluvchi Oysuluv ismli yosh qiz shafqatsiz tarzda zo‘rlanib, keyin o‘ldirilgan. Bu haqda “Turmush” nashri xabar berdi.
Ma’lumotlarga ko‘ra, voqea sentabr oyining oxirlarida sodir bo‘lgan. Oysuluv tushdan keyin dugonasi bilan uchrashish maqsadida uyidan chiqib, Qorako‘l shahriga yo‘l olgan.
Yo‘l chog‘ida unga “Honda Stream” rusumli avtomobil to‘xtagan. Avtomobil haydovchisi 1984 yilda tug‘ilgan, ilgari bir necha bor sudlangan erkak ekani aniqlangan.
Qiz dugonasiga yetib bormagan. Tergov natijalariga ko‘ra, erkak uni olma bog‘i tomon olib borib zo‘rlagan, keyin jinoyati oshkor bo‘lishidan qo‘rqib, uni bo‘g‘ib o‘ldirgan.
So‘ngra jasadni Kemin tumani hududiga tashlab ketgan va Bishkekka qochib ketgan. Shu paytda u telefonini ham ataylab yo‘q qilgan.
Oysuluvning qarindoshlari uni izlab, taxminan soat 19:30 da politsiyaga murojaat qilgan. Afsuski, bu vaqtda qiz allaqachon hayotdan ko‘z yumgan edi.
Huquqni muhofaza qiluvchi organlar qisqa muddat ichida gumonlanuvchini qo‘lga olishga muvaffaq bo‘ldi. Oysuluv 30 sentyabr kuni o‘z qishlog‘ida, yaqinlari va butun mahalla ahli ishtirokida dafn etildi.
Politsiya ma’lumotlariga ko‘ra, jinoyatni 41 yoshli Bishkek shahrida yashovchi erkak sodir etgan. U faqat zo‘rlash bilan cheklanmay, qizning hayotiga qasd qilgan.
Hozirda tergov jarayonida zarur ekspertizalar tayinlangan. Marhumaning qarindoshlari dastlab politsiya arizalarini kechiktirib qabul qilganini, “uch kun o‘tmaguncha izlash mumkin emas” degan gaplar bo‘lganini bildirishgan.
Ammo Ichki ishlar vazirligi xizmat tekshiruvi o‘tkazib, bunday ma’lumotlar asossiz ekanligini ma’lum qildi. Hozir tergov harakatlari davom etmoqda.
Mahalliy jamoatchilik ushbu voqea yuzasidan adolat talab qilmoqda va yosh qizning o‘limi mamlakatdagi zo‘ravonlikka qarshi kurashda muhim ahamiyat kasb etishini ta’kidlamoqda.
