Meksikada bo‘ronlar oqibatida 72 kishi halok bo‘ldi
Meksikada so‘nggi kunlarda yuz bergan tabiiy ofatlar mamlakatda katta fojialarga sabab bo‘ldi. Bu haqda Zamin.uz xabar berdi.
Priskitla va Reymond nomli tropik bo‘ronlar oqibatida kuchli yomg‘ir yog‘ib, suv toshqinlari yuzaga keldi. Natijada 72 nafar inson halok bo‘ldi.
Shu bilan birga, 48 nafar odam bedarak yo‘qolgan bo‘lib, ularni qidirish ishlari davom etmoqda. Oxirgi haftada Meksikaning Verakrus, Puebla, Idalgo, Tabasko va Oaxaka shtatlarida sel va kuchli yomg‘irlar ko‘plab zarar yetkazdi.
Eng katta vayronagarchilik Verakrus va Puebla viloyatlarida kuzatildi. Ko‘plab uylar buzilib, ko‘priklar va yo‘llar vayron bo‘ldi, minglab odamlar boshpanasiz qoldi.
Meksika hukumati ofat oqibatlarini bartaraf etish uchun katta kuchlarni safarbar qildi. Qutqaruv ishlarida 21 ta vertolyot va qo‘shimcha guruhlar faoliyat yuritmoqda.
Ular suv bosgan hududlar, vayrona binolar va chuqur jarliklarda izlanmoqda. Elektr energiyasi bo‘yicha federal komissiya ma’lumotiga ko‘ra, beshta shtatda elektr ta’minoti tizimining 95 foizdan ortig‘i tiklandi.
Muhandislar va kommunal xizmatlar birga ishlamoqda. Hukumat evakuatsiya qilingan aholi uchun vaqtincha boshpana tashkil etgan, jabrlanuvchilarga oziq-ovqat, suv va tibbiy yordam ko‘rsatilmoqda.
Mahalliy ommaviy axborot vositalari xabariga ko‘ra, bo‘ronlar atmosferada bosim pasayishiga olib kelib, ayrim hududlarda suv sathi ikki metrga yetdi. Bu esa ko‘plab yo‘llarning suv ostida qolishiga sabab bo‘ldi.
Hozirda qutqaruv va tiklash ishlari davom etmoqda.
