Jakartada it va mushuk go‘shti savdosi taqiqlanadi
Indoneziya poytaxti Jakartada hayvonlarga nisbatan shafqatsiz munosabatni kamaytirish va quturish kasalligining tarqalishini oldini olish maqsadida it va mushuk go‘shti savdosini taqiqlovchi qonun loyihasi ishlab chiqilmoqda. Bu haqda Zamin.uz xabar berdi.
Jakarta gubernatori Pramono Anungning ma’lum qilishicha, shaharda har oy 9 mingdan ortiq it so‘yiladi, bu esa nafaqat axloqiy muammolar, balki sanitariya xavfi ham tug‘diradi. Unga ko‘ra, Jakartada it go‘shti inson iste’moli uchun mo‘ljallanmagan.
Qonun loyihasi bir oy ichida tayyorlanishi kutilmoqda va u Dog Meat Free Indonesia koalitsiyasi bilan hamkorlikda ishlab chiqilmoqda. Qonun qabul qilingach, it va mushuk go‘shti savdosi rasman man etiladi.
Bu qaror quturish kasalligini oldini olish va hayvonlarga nisbatan insonparvar munosabatni mustahkamlash yo‘lida muhim qadam sifatida baholanmoqda. Hozirgi vaqtda Jakarta Sog‘liqni saqlash vazirligi tomonidan “quturishsiz hudud” sifatida e’tirof etilgan kam sonli mintaqalardan biridir.
Indoneziyada it va mushuklar chorva hayvoni sifatida tan olinmagani sababli, ularning go‘shtini sotish yoki so‘yish bo‘yicha aniq qonun mavjud emas. Bu esa ayrim hududlarda it va mushuk go‘shtini oziq-ovqat sifatida ishlatish amaliyotining davom etishiga olib kelmoqda.
Ayrim aholilar buni an’ana yoki arzon oqsil manbai sifatida qabul qiladi. Biroq huquq himoyachilari itlar tor qafaslarda saqlanishi, kaltaklanishi va so‘yilishdan oldin azoblanishi holatlarini qattiq qoralamoqda.
Har oy minglab itlar G‘arbiy Yava va Bali orollaridan Jakartaga yashirin yo‘llar orqali olib kelinadi. Veterinar mutaxassislarning ogohlantirishicha, quturish virusi asosan kasal hayvonning so‘lagi orqali tishlash yoki tirnash orqali odamga yuqadi.
Kasallikning dastlabki belgilari isitma, bosh og‘rig‘i, mushak og‘rig‘i va uyqusizlikdir. Keyinchalik suvdan va yorug‘likdan qo‘rqish holatlari paydo bo‘ladi.
Agar vaqtida davolash amalga oshirilmasa, quturish o‘limga olib kelishi mumkin. Yangi qonun nafaqat hayvonlarga nisbatan shafqatsizlikni kamaytiradi, balki inson sog‘ligini himoya qilishda ham muhim ahamiyatga ega.
