Shimoliy Qozog‘istonda ichkilikka qarshi qishloqlar ko‘paymoqda
Shimoliy Qozog‘istonda sog‘lom turmush tarzini tanlagan aholining soni ortib bormoqda. Bu haqda Zamin.uz xabar berdi.
Mamlakatdagi 21 ta qishloq spirtli ichimliklardan butunlay voz kechgan. Bu harakat bir necha yil avval boshlangan bo‘lib, hozirda uni qo‘llab-quvvatlovchilar soni keskin oshmoqda.
Masalan, Qiziljar tumanidagi Baysal qishlog‘ida oqsoqollar va yoshlar birgalikda spirtli ichimliklarni boykot qilishga qaror qilgan. Baysal aholisi ichkiliksiz sog‘lom muhitda yashashdan faxrlanadi.
Qishloqda 60 ga yaqin fermer xo‘jaligi faoliyat yuritadi, ularning asosiy yo‘nalishlari chorvachilik va parranda yetishtirishdir. Ichkilikni tark etish nafaqat sog‘lom turmush uchun, balki yangi avlod uchun pok muhit yaratish maqsadini ham ko‘zlaydi.
Politsiya ma’lumotlariga ko‘ra, Baysal va shunga o‘xshash “hushyor qishloqlarda” jinoyatchilik darajasi 14 foizga kamaygan. Bu esa tashabbusning samaradorligini ko‘rsatadi.
Hozirda Qozog‘istonda bu kabi qishloqlar soni 21 taga yetgan, oldin esa faqat 13 ta edi. Shuningdek, G‘arbiy Qozog‘istondagi 33 ta qishloqda spirtli ichimliklarga rasmiy taqiq joriy qilingan.
Mutaxassislar fikricha, bu harakat sog‘lom turmush tarzini targ‘ib qilish bilan birga jamiyat ongini o‘zgartirishda muhim ahamiyatga ega. Bunday qishloqlar butun mamlakat uchun yaxshi namuna bo‘lmoqda.
