Luvr muzeyidan Napoleon buyumlari o‘g‘irlandi
Fransiya poytaxti Parij shahridagi dunyoning eng mashhur muzeyi hisoblangan Luvrda katta o‘g‘irlik sodir bo‘ldi. Bu haqda Zamin.uz xabar berdi.
19-oktyabr kuni noma’lum shaxslar Napoleon Bonapart davriga oid noyob zargarlik buyumlarini muzeydan olib chiqib ketishdi. Bu haqda Bild nashri xabar berdi.
Ma’lumotlarga ko‘ra, jinoyatchilar muzeyning Sen daryosi tomon joylashgan qismining qurilish maydoni orqali kirib, oynani sindirish yo‘li bilan ichkariga yo‘l topganlar. O‘g‘irlangan buyumlar orasida Napoleonning rafiqasi Jozefinaga tegishli bo‘lgan tarixiy qiymati yuqori brosh, tiara va bezakli g‘ilof kabi to‘qqizta noyob zargarlik buyumi borligi ma’lum qilindi.
Fransiya madaniyat vaziri Rashida Dati hodisani rasmiy ravishda tasdiqlab, jabrlanganlar yo‘qligini bildirdi. Hozirda Luvr muzeyi vaqtincha yopilgan, politsiya hamda tergovchilar voqea joyida ish olib bormoqda.
Ichki ishlar vazirligi ma’lumotiga ko‘ra, o‘g‘irlik bo‘yicha Interpol darajasida qidiruv ishlari boshlanib, muzey xavfsizlik tizimi to‘liq qayta ko‘rib chiqilishi rejalashtirilmoqda. Mahalliy manbalar ta’kidicha, bu voqea nafaqat Luvr, balki butun Yevropa muzeylari uchun katta saboq bo‘lishi mumkin.
San’atshunoslar voqeani so‘nggi yillarda Yevropada sodir bo‘lgan eng yirik madaniy o‘g‘irlik deb baholamoqda. Eslatib o‘tamiz, ilgari ham Napoleon Bonapartga tegishli qimmatbaho qilich auksion orqali sotilgan edi.
Endilikda esa uning davriga oid buyumlar yana qimmatli tarixiy yo‘qotish sifatida e’tiborga olinmoqda.
