Janubiy Uelsda sun’iy intellekt suzuvchilarni xavfga soldi
Buyuk Britaniyaning Janubiy Uels hududida ikki suzuvchi sun’iy intellektning noto‘g‘ri tavsiyasi tufayli halokatga yaqinlashdi. Bu haqda Zamin.uz xabar berdi.
Futurism nashrining xabariga ko‘ra, ular suv to‘lqini vaqti haqidagi ma’lumotni ChatGPT orqali olgan, ammo hisob-kitob noto‘g‘ri chiqqan. Salli orolidan qirg‘oqqa qaytishni rejalashtirgan suzuvchilar suzishdan oldin neyron tarmoqdan past va baland suv vaqti haqida so‘ragan.
Biroq sun’iy intellekt ularga noto‘g‘ri jadvalni taqdim etgan. Suzuvchilardan biri shunday dedi: "Men past suv vaqtini ChatGPT orqali tekshirib, katta xatoga yo‘l qo‘ydim.
U yerda 9:30 deb yozilgandi. Biz yetib olamiz deb o‘yladik, lekin qaytganimizda vaziyat mutlaqo boshqacha bo‘lib chiqdi.
Bu biz uchun katta saboq bo‘ldi." Baxtga qarshi, dengiz bo‘yidagi restoran egasi Gordon Xedfild ularga yordamga yetib kelgan. U to‘lqin tez ko‘tarilayotganini ko‘rib, megafon yordamida suzuvchilarni orqaga qaytishga chaqirgan.
Xedfildning so‘zlariga ko‘ra, ular allaqachon yarim yo‘lda bo‘lgan va suv tez sur’atda ko‘tarilayotgan edi. Agar suzuvchilar oldinga davom etganida, natija fojiali bo‘lishi mumkin edi.
Ma’lumotlarga ko‘ra, bu hudud dunyodagi eng kuchli to‘lqin harakatlari bilan mashhur bo‘lib, to‘lqin balandligi 15 metrgacha yetishi mumkin. Oqimlar soatiga 13 kilometr tezlik bilan harakat qilib, qisqa vaqt ichida xavfsiz joyni falokatli hududga aylantiradi.
Bu voqea sun’iy intellekt insonning ongli diqqati va tajribasini to‘liq almashtira olmasligini yana bir bor isbotladi. Tajribali inson e’tibori va ehtiyotkorligi har doim birinchi o‘rinda turishi lozim.
