AQShda ko‘rshapalaklar go‘zallik tanlovi boshlandi
Amerika Qo‘shma Shtatlarida ko‘rshapalaklar orasida go‘zallik tanlovi o‘tkazilmoqda. Bu haqda Zamin.uz xabar berdi.
G‘oliblik uchun Betlor Svift, Robert Battinson, Bett Deymon va janob Potter kabi nomzodlar bellashmoqda. Har yili tashkil etiladigan ushbu onlayn tanlov Federal Yer Tuzish Byurosi tomonidan o‘tkaziladi.
Ularning maqsadi ko‘rshapalaklar haqida jamiyatdagi xabardorlikni oshirishdir. Bu yilgi musobaqa ketma-ket beshinchi marta tashkil qilinmoqda.
Ishtirokchilarning fotosuratlari ijtimoiy tarmoqlarda e’lon qilinib, obunachilardan eng chiroyli ko‘rshapalakni tanlash so‘raladi. Tanlov 24 oktyabrda boshlandi va natijalari 31 oktyabr, ya’ni Xellouin kuni e’lon qilinadi.
Yovvoyi tabiat bo‘yicha mutaxassis Emma Baskning ta’kidlashicha, ko‘rshapalaklar haqidagi ko‘plab noto‘g‘ri tushunchalar mavjud. Ularning faqat bir qismi quturish kasalligini tarqatishi mumkin va bu kasallik odamga o‘tishi juda kam uchraydi.
O‘tgan yili tanlov g‘olibi Oregon shtatidan bo‘lgan Uilyam Shekspir laqabli quloqli ko‘rshapalak bo‘lgan. Shu kabi tanlovlar orqali tabiatga mehr va e’tibor oshirilishi, ko‘rshapalaklarning ahamiyati haqida kengroq ma’lumot berilishi ko‘zda tutilgan.
