Pavel Durov Luvr o‘g‘irliklarini tanqid qildi

Telegram asoschisi Pavel Durov yaqinda Fransiyaning Luvr muzeyida sodir bo‘lgan o‘g‘irlik voqeasidan so‘ng mamlakat hukumatini tanqid qildi. Bu haqda Zamin.uz xabar berdi.

U o‘g‘irlangan taqinchoqlarni shaxsan sotib olib, muzeyga qaytarishga tayyorligini bildirdi. Durov o‘zining ijtimoiy tarmog‘ida Fransiya rahbariyatini haqiqiy tahdidlar bilan kurashish o‘rniga soxta muammolar ortidan quvishda aybladi.

Uning fikricha, Luvr muzeyidagi talon-toroj mamlakatning avvalgi buyuk mavqeining pasayishini ko‘rsatadi. Pavel Durov keyinchalik yana bir bayonot berib, o‘g‘irlangan taqinchoqlarni sotib olib, ularni Abu-Dabi Luvriga qaytarishga tayyorligini ma’lum qildi.

U Abu-Dabidagi Luvr muzeyi xavfsizligini ta’kidlab, u yerda o‘g‘irlik sodir bo‘lmasligini aytdi. Shuningdek, Durov o‘tgan yili Fransiyada hibsga olingani va keyin ozod etilgani haqida eslatib o‘tdi.

U bu voqea Fransiyaning erkin davlat sifatidagi obro‘siga salbiy ta’sir ko‘rsatganini ta’kidladi. Pavel Durovning fikricha, hozirgi vaziyat mamlakat uchun jiddiy sinovdir va hukumat o‘z vazifasini qayta ko‘rib chiqishi lozim.