Hegsetning galstugi Amerika siyosatida mojaro yaratdi
Amerika siyosiy maydonida yangi mojaro yuzaga keldi. Bu haqda Zamin.uz xabar berdi.
Ushbu mojaroning sababi oddiy ko‘rinishi bilan birga ramziy ahamiyatga ega bo‘lgan bir narsa — Mudofaa vaziri Pit Hegsetning taqqan galstugi bo‘ldi. 17-oktyabr kuni Donald Tramp va Vladimir Zelenskiy uchrashuvi chog‘ida vazirning galstuk rangi jurnalistlar orasida katta munozaraga sabab bo‘ldi, deb xabar beradi “HuffPost” nashri.
Hegset tadbirda oq, ko‘k va qizil ranglardan tashkil topgan galstuk taqqan edi. Ushbu ranglar Amerika bayrog‘ida mavjud bo‘lsa-da, galstukdagi ranglarning ketma-ketligi aynan Rossiya bayrog‘iga o‘xshashligi diqqatni tortdi.
“HuffPost” jurnalisti Es Vi Deyt bu vaziyatni Pentagon vakillaridan izohlashni so‘radi. U Hegsetning bunday galstukni tanlashiga Rossiyadan qandaydir maqtovlar bo‘lgan-yo‘qligini va vazir ilgari ham shunday galstuk taqqanligini aniqlashga harakat qildi.
Ammo jurnalistga AQSh Mudofaa vazirligi vakili Shon Parnelldan keskin va haqoratli javob berildi. U: “Bu galstukni onang sotib olgan.
Bu haqiqiy Amerika galstugi, ahmoq”, — dedi. So‘ng jurnalist Hegsetning AQSh bayrog‘i ramzlarini kiyimda ishlatish taqiqlari haqida xabardorligi bor-yo‘qligini so‘radi.
Pentagon matbuot kotibi Kingsli Uilson bu masalaga izoh berdi. U: “Agar yurtga muhabbat va ramzlardan faxrlanish “HuffPost” kabi so‘l tarafdagi bloglar uchun jinoyat hisoblansa, unda vazir Hegset aybdor.
U haqiqiy vatanparvar, mamlakatini va bayrog‘ini yurakdan sevadi”, — dedi. “HuffPost”ning savollari faqat galstuk bilan cheklanib qolmadi, ular Tramp ma’muriyati bilan ham yangi bahs-munozaralarga sabab bo‘ldi.
Nashr Budapeshtda bo‘lib o‘tishi rejalashtirilgan Tramp va Putin uchrashuvi haqida Oq Uyga izoh so‘radi. Biroq javob yana hazil va tahqir tarzida bo‘ldi: “Buni sening onang qilgan”, — dedi Oq Uy matbuot kotibi Kerolayn Levitt.
Amerika ommaviy axborot vositalarida bu holat siyosiy savollarga shaxsiy haqoratlar bilan javob qaytarish tendensiyasi sifatida baholanmoqda. Ba’zi tahlilchilarning fikricha, Tramp ma’muriyati yaqinda qayta ishga tushgan kommunikatsiya uslubi orqali “so‘l jurnalistikaga qarshi kurash”ni boshlagan.
Shu bilan birga, Hegsetning “vatanparvar galstugi” atrofidagi janjal mamlakatdagi siyosiy bo‘linishni yanada oshkor qildi.
