Janubiy Koreyada suvarak yong‘ini halokatga olib keldi
Janubiy Koreyada kutilmagan va og‘ir fojea yuz berdi. Bu haqda Zamin.uz xabar berdi.
Bir ayol suvaraklarni yo‘q qilish maqsadida yonuvchi purkagich vositasidan foydalangan vaqtida o‘z uyida yong‘in chiqdi. Hodisa 20-oktyabr kuni Osan shahrida sodir bo‘ldi.
Ayol ilgari ham shunday usuldan foydalanib kelgan bo‘lsa-da, bu safar voqea jiddiy oqibatlarga olib keldi. Yong‘in tez tarqalib, butun xonadonni qamrab oldi.
Politsiya ayolga nisbatan “bexosdan yong‘in chiqarish” va “ehtiyotsizlik tufayli inson o‘limiga sabab bo‘lish” bo‘yicha jinoyat ishi ochilishi mumkinligini ma’lum qildi. Yong‘in paytida uning qo‘shnisi, 30 yosh atrofidagi xitoylik ayol, beshinchi qavatdagi uyidan qochishga harakat qilib, derazadan tushishga urinayotganda yiqilib, halok bo‘ldi.
Uning eri va ikki oylik chaqalog‘i xonadonda bo‘lgan. Er-xotin yong‘inni sezib, chaqaloqni qo‘shni uyga uzatib, uni qutqarishga muvaffaq bo‘lgan.
Er odam qo‘shni binoga o‘tishga ulgurgan, ammo ayolini saqlab qololmadi. Mahalliy manbalarga ko‘ra, yong‘in vaqtida zinapoyalarni qoplagan zich tutun sabab ko‘pchilik qochishga ulgurmagan.
Binoning pastki qavatida do‘konlar joylashgan bo‘lib, yuqori qavatlarda 30 dan ortiq xonadon mavjud edi. Yong‘in oqibatida sakkiz kishi turli darajadagi zaharlanish bilan shifoxonaga yotqizildi.
Tadqiqotchilar so‘nggi yillarda internet va ijtimoiy tarmoqlarda suvaraklarga qarshi olov bilan kurashish usullari ommalashgani haqida ogohlantirmoqda. Bunday usullar yopiq joylarda xavfli portlash va yong‘inga sabab bo‘lishi mumkin.
Shunga o‘xshash holat 2018-yilda Avstraliyada ham qayd etilgan bo‘lib, u yerda erkak purkagich yordamida suvarakni yoqishga uringanida, oshxona butunlay yonib ketgan edi. Mutasaddilar fuqarolarni bunday xavfli usullardan voz kechishga va suvaraklarni yo‘q qilish uchun xavfsiz, oddiy vositalardan foydalanishga chaqirmoqda.
Chunki beparvolik nafaqat mol-mulk, balki inson hayotiga ham jiddiy zarar yetkazishi mumkin. Har bir inson o‘z xavfsizligini birinchi o‘ringa qo‘yishi lozim.
