Litva Belarusdan havo sharlari sababli chegara yopdi
Litva hukumati Belarus hududidan noqonuniy yuklar ortilgan havo sharlari uchirilishi sababli ikki davlat o‘rtasidagi barcha chegara o‘tish punktlarini 25-oktabr soat 12:00 ga qadar yopishga qaror qildi. Bu haqda Zamin.uz xabar berdi.
Bu haqda Litva bosh vaziri Inga Ruginene rasmiy bayonot berdi. 24-oktabr kuni mahalliy vaqt bilan soat 20:30 atrofida Vilnyus va Kaunas aeroportlari yo‘nalishida uchib kelayotgan havo sharlari aniqlanib, xavfsizlik nuqtai nazaridan parvozlar vaqtincha to‘xtatildi.
Aeroport ma’muriyati bu holatning qisqa muddatli ekanligini va parvozlar tez orada tiklanishini ma’lum qildi. Ma’lumotlarga ko‘ra, so‘nggi bir oy ichida Belarusdan Litva hududi tomon uchirilgan havo sharlari bilan bog‘liq uchinchi holat ro‘y berdi.
Rasmiylar bunday harakatlarni davlat xavfsizligiga tahdid deb baholab, zarur choralar ko‘rilishini ta’kidlamoqda. Ushbu voqealar ikki davlat o‘rtasidagi munosabatlarda keskinlikni kuchaytirmoqda.
Litva hukumati xavfsizlikni ta’minlash maqsadida barcha imkoniyatlarni ishga solmoqda.
