Buyuk Britaniyada 260 dan ortiq mahkum xato bilan ozod qilindi
Buyuk Britaniyada qamoq tizimida katta xato yuz berdi. Bu haqda Zamin.uz xabar berdi.
So‘nggi bir yil ichida 260 dan ortiq mahkum noqonuniy ravishda ozod etilgan. Bu haqda “Sky News” telekanali hukumat statistikasiga tayangan holda ma’lumot berdi.
2024 yil martidan 2025 yil martigacha bo‘lgan davrda 233 kishi qamoqxonalardan, yana 29 nafar mahkum esa sud zallaridan xatolik tufayli ozod qilingan. Bu ko‘rsatkich o‘tgan yilga nisbatan 128 foizga ko‘pdir.
Mazkur holat efiopiyalik muhojir Xadush Kebatu ishi sababidan jamoatchilik e’tiboriga tushdi. U jinsiy jinoyat uchun hukm qilingan bo‘lsa-da, deportatsiya jarayonida adashib ozod qilindi va so‘ng qochib ketdi.
Keyinchalik uning Londonda ekanligi ma’lum bo‘ldi. Kebatuning 14 yoshli qiz va bir ayolga nisbatan qilgan harakatlari ortidan Buyuk Britaniyada norozilik namoyishlari boshlandi.
Fuqarolar hukumatdan muhojirlarni mehmonxonalarda joylashtirish amaliyotini to‘xtatishni talab qilmoqda. Hozirgi vaqtda mamlakat bo‘ylab 210 ta mehmonxonada taxminan 32 mingdan ortiq noqonuniy muhojir yashamoqda.
“The Times” nashrining ma’lumotlariga ko‘ra, bu tizim britaniyalik soliq to‘lovchilarga yiliga taxminan 4 milliard funt sterlingga tushmoqda. Hukumat esa 2029 yilgacha bu amaliyotni to‘liq bekor qilishni va’da qilgan.
Mutaxassislar fikricha, qamoqxona tizimidagi xatolik nafaqat byurokratik kamchilik, balki mamlakatdagi muhojirlar siyosatidagi jiddiy muammolarni ham ko‘rsatmoqda.
