Sındırgıda 6,1 magnitudali zilzila sodir bo‘ldi
Turkiyaning Sındırgı hududida 27-oktabr kuni mahalliy vaqt bilan soat 22:48 da 6,1 magnitudali zilzila yuz berdi. Bu haqda Zamin.uz xabar berdi.
Bu haqda Favqulodda vaziyatlar boshqarmasi ma’lum qildi. Zilzila markazi taxminan 6 kilometr chuqurlikda bo‘lib, silkinishlar qo‘shni viloyatlarda ham sezildi.
Ichki ishlar vaziri Ali Yerlikaya ijtimoiy tarmoqlarda bildirishicha, zilzila oqibatida uchta bino va bir do‘kon qulagan. Binolarda bo‘lgan odamlar muvaffaqiyatli evakuatsiya qilindi.
Sog‘liqni saqlash vaziri Kemal Memishog‘lu ma’lumotiga ko‘ra, 19 kishi jabrlangan, ularning ko‘pchiligi vahima yoki derazadan sakrash natijasida jarohat olgan. To‘rt nafar jabrlanuvchi shifoxonadan chiqarilgan, qolganlarning ahvoli barqaror deb baholanmoqda.
Hodisa joyida qutqaruv ishlari davom etmoqda va zaruriy yordam ko‘rsatilmoqda. Rasmiylar aholini hushyor bo‘lishga chaqirmoqda.
Turkiyada zilzilalarga qarshi xavfsizlik choralari kuchaytirilmoqda.
