Xitoy 2027 yilga qadar sun’iy quyosh ishga tushiradi
Xitoy 2027 yilgacha yadro sintezi asosida ishlaydigan “sun’iy quyosh” loyihasini ishga tushirishni rejalashtirmoqda. Bu haqda Zamin.uz xabar berdi.
Burning Plasma Experimental Superconducting Tokamak (BEST) nomi bilan tanilgan ushbu loyiha mamlakatning yadro energiyasi sohasidagi ko‘p yillik izlanishlari natijasidir. Loyihaning asosiy maqsadi Quyoshdagi energiya jarayonlarini yer sharoitida takrorlash va cheksiz, toza energiya manbaini yaratishdan iborat.
Ma’lumotlarga ko‘ra, Xitoy olimlari 2025 yilda Xefey shahridagi Experimental Advanced Superconducting Tokamak (EAST) qurilmasida plazmani 1000 sekunddan ortiq yuqori haroratda barqaror ushlab turishga muvaffaq bo‘lishdi. Bu ilmiy yutuq yadro sintezi sohasida muhim qadam hisoblanadi.
Biroq ekspertlar hozircha ushbu texnologiya to‘liq energiya manbaiga aylana olmaganini ta’kidlamoqda. Reaktor ishlab chiqargan energiya sarflagan energiyasidan ko‘p emas.
Shuningdek, materiallarning chidamliligi va jarayonni sanoat miqyosida barqarorlashtirish kabi muammolar hanuzgacha hal etilishi zarur. Agar Xitoy 2027 yilgacha “sun’iy quyosh” loyihasini muvaffaqiyatli ishga tushira olsa, bu jahon energetika tizimida katta o‘zgarishlarga sabab bo‘lishi mumkin.
Ushbu loyiha kelajakda toza va cheksiz energiya manbaini yaratishda muhim ahamiyat kasb etadi.
