O‘zbekistonda har yili o‘tkaziladigan "Biz — donormiz" aksiyasi boshlandi. Bu haqda Zamin.uz xabar berdi.
Aksiyaning birinchi kunida ishtirokchilar tomonidan jami 88,5 litr qon topshirildi. Bu haqda "Yuksalish" umummilliy harakati raisi Bobur Bekmurodov ma’lum qildi.
Uning so‘zlariga ko‘ra, aksiya 2024 yildan buyon muntazam ravishda tashkil etilib, milliy qon zaxiralarini to‘ldirish va qon yetishmovchiligi muammosini bartaraf etishga qaratilgan. Shu kungacha tashabbus doirasida ming litrdan ortiq qon yig‘ilgan.
Joriy yilda aksiya 28-oktabrdan 3-noyabrgacha mamlakatning barcha hududlarida o‘tkaziladi. Tashkilotchilar aholini birdamlikka chaqirib, yordamlarga muhtoj insonlarga ko‘mak berish maqsadida o‘z hissasini qo‘shishga taklif qilmoqda.
Ushbu aksiyaning o‘tkazilishi sog‘liqni saqlash tizimining barqaror ishlashi va bemorlarning qon ehtiyojini qondirishda muhim ahamiyat kasb etadi. Shuning uchun har bir fuqaro o‘z imkoniyatidan kelib chiqqan holda qon topshirishga faol qatnashishi lozim.
Bu orqali jamiyatda sog‘lom va mehribon muhit yaratiladi hamda inson hayotini saqlashga hissa qo‘shiladi.
