Turkiyada 7 qavatli bino qulab, bolalar halok bo‘ldi
Turkiyaning Qodjaeli viloyati, Gebze shahrida 7 qavatli turar joy binosi qulab tushdi. Bu haqda Zamin.uz xabar berdi.
Hodisa 29 oktyabr kuni ertalab yuz bergan. Rasmiy ma’lumotlarga ko‘ra, binoning qulashidan bir oila vayrona ostida qolgan.
Fojia natijasida ikki nafar bola halok bo‘lgan, yana bir qiz bola esa tirik holda qutqarilib, shifoxonaga yetkazilgan. Voqea joyida 600 dan ortiq qutqaruvchi va o‘t o‘chiruvchi xodimlar, shuningdek, maxsus texnikalar jalb etilgan.
Ayni paytda vayronalar orasida boshqa odamlarning bor-yo‘qligi o‘rganilmoqda. Mutaxassislar binoning qulashiga olib kelgan sabablarni tahlil qilmoqda.
Xususan, poydevor holati, qurilish sifati va atrofdagi infratuzilma ishlari sinchiklab o‘rganilmoqda. Ushbu fojiani batafsil o‘rganish uchun hukumat maxsus komissiya tashkil etgan.
Hozirda Gebze shahrida xavfsizlik choralari kuchaytirilgan. Shuningdek, barcha binolarning texnik holati qayta tekshirilayotgani ma’lum qilingan.
