Kappadokiyada 61 kg oltin kontrabandasi fosh etildi
Turkiyaning Nevshahir viloyatida joylashgan Kappadokiya aeroportida qimmatbaho metallarni noqonuniy olib kirishga urinish fosh etildi. Bu haqda Zamin.uz xabar berdi.
Ushbu operatsiya davomida besh nafar O‘zbekiston fuqarosi va bir nafar Turkiya fuqarosi qo‘lga olindi. Mazkur shaxslar 61 kilogrammdan ortiq oltinni noqonuniy yo‘l bilan olib kirishga uringan.
Nevshahir politsiyasining kontrabanda va uyushgan jinoyatchilikka qarshi kurash bo‘limi oldindan olingan ma’lumotlar asosida harakat qilgan. Gumonlanuvchilar – uch nafar ayol va ikki nafar erkak O‘zbekiston fuqarolari Istanbuldan Kappadokiyaga uchayotgan bo‘lgan.
Ularning bagajlari aeroport xodimlarining e’tiborini tortgan, ayniqsa, og‘irligi me’yordan oshgan maishiy texnikalar – go‘sht maydalagich va xamir qorish mashinalari shubha uyg‘otgan. Maxsus uskunalar yordamida o‘tkazilgan tekshiruv natijasida texnikalar ichiga yashirilgan oltin quymalari aniqlangan.
Ushbu quymalar metall qismlar ko‘rinishida mohirona yashirilgan bo‘lib, ularning umumiy og‘irligi 61 kilogramm 121 grammni tashkil etgan. Mazkur oltin 24 karatli bo‘lib, uning bozor qiymati 355 million turk lirasi yoki taxminan 8,5 million AQSh dollariga teng deb baholangan.
Bu Turkiyada so‘nggi yillardagi eng yirik oltin kontrabandasi holatlaridan biri sifatida qayd etildi. Shuningdek, yukni kutib olish uchun kelgan turk fuqarosi ham qo‘lga olingan.
Qo‘lga olinganlarning barchasi qamoqqa olinib, dastlabki tergov jarayonidan so‘ng sudga yuborilgan. Shu bilan birga, o‘zbekistonlik gumondorlardan biri noqonuniy migratsiyaga qarshi kurash bo‘limiga topshirilib, deportatsiya qilinishi kutilmoqda.
Hozirda oltinning kelib chiqishi va yakuniy manzili aniqlash bo‘yicha tergov ishlari davom etmoqda.
