ChatGPT foydalanuvchilari orasida ruhiy xavotirlar kuzatilmoqda
OpenAI kompaniyasi tomonidan e’lon qilingan ma’lumotlarga ko‘ra, ChatGPT foydalanuvchilari orasida ba’zi xavotirli holatlar kuzatilgan. Bu haqda Zamin.uz xabar berdi.
Jumladan, har hafta foydalanuvchilarning taxminan 0,07 foizida maniya, psixoz yoki o‘z joniga qasd qilish kabi alomatlar aniqlangan. BBCning xabar berishicha, yana 0,15 foiz muloqotlarda o‘ziga zarar yetkazish niyatini bildiruvchi signallar mavjud.
OpenAI kompaniyasi bu holatlarni kam uchraydigan deb hisoblaydi. Biroq foydalanuvchilar sonining umumiy miqdori 800 milliondan oshgani uchun bu ko‘rsatkich minglab insonlarga taalluqli bo‘lishi mumkin.
Shu sababli kompaniya 170 dan ortiq ruhiy salomatlik bo‘yicha mutaxassislarni jalb etgan va professional yordam ko‘rsatishga yo‘naltirilgan maxsus javob algoritmlarini ishlab chiqqan. Kaliforniya universiteti professori Jeyson Nagataning so‘zlariga ko‘ra, sun’iy intellekt ba’zi hollarda foydalanuvchilarga yordam berishi mumkin, ammo u ruhiy salomatlik bo‘yicha mutaxassislarni to‘liq almashtira olmaydi.
Yaqinda Kaliforniyada bir o‘smirning oilasi OpenAI kompaniyasiga qarshi da’vo arizasi bergan. Ularning ta’kidlashicha, ChatGPT o‘smirning xavfli fikrlarini bilvosita qo‘llab-quvvatlagan.
OpenAI bu holat yuzasidan afsus bildirgan va mazkur voqeani batafsil o‘rganayotganini ma’lum qilgan. Kompaniya bunday holatlarning oldini olish uchun yanada samarali choralar ko‘rishni rejalashtirmoqda.
