Meksika Prezidenti bilan uchrashuvda nojo‘ya hodisa yuz berdi
Meksikada noodatiy voqea sodir bo‘ldi, deb xabar bermoqda “Associated Press”. Bu haqda Zamin.uz xabar berdi.
Mamlakat Prezidenti Klaudiya Sheynbaum poytaxt Mexikoning tarixiy hududida fuqarolar bilan uchrashuv o‘tkazayotgan paytda mast holatdagi bir erkak unga yaqinlashib, nojo‘ya harakat qilgan. Erkak Prezidentga yaqinlashib, o‘pmoqchi bo‘lgandek ko‘ringan va qo‘llari bilan tegishga uringan.
Prezident Klaudiya Sheynbaum esa vaziyatga muloyimlik bilan munosabat bildirib, erkakni orqaga qaytarib, uning qo‘lini itargan va “Xavotir olmang” degan so‘zlar bilan holatni tinchlantirgan. Hukumat vakillaridan biri voqeaga aralashgan bo‘lsa-da, Prezident ma’muriyati hodisa yuzasidan hozircha rasmiy bayonot bermagan.
Eslatib o‘tamiz, Klaudiya Sheynbaum xalq bilan yaqin muloqotni afzal ko‘radi. U odatda fuqarolar bilan suhbatlashish, suratga tushish va qo‘l berib salomlashish kabi oddiy va ochiq uslublarni tanlaydi.
Ammo bu safar xavfsizlik xizmati xodimlarining vaziyatga o‘z vaqtida aralasha olmagani tanqidga sabab bo‘ldi.
