Hindistonlik talabalar urushga yuborilib halok bo‘ldi

Rossiya armiyasi bilan shartnoma imzolagan bir necha hindistonlik talabalar Ukrainadagi janglarda halok bo‘lgani haqida xabarlar paydo bo‘ldi. Bu haqda Zamin.uz xabar berdi.

Ularning yaqinlari bergan ma’lumotlarga ko‘ra, bu talabalar “tez pul topish” va Rossiya fuqaroligini olish va’dalari bilan aldangan. Biroq, ular hech qanday harbiy tayyorgarliksiz to‘g‘ridan-to‘g‘ri frontga jo‘natilgan.

Ma’lum qilinishicha, talabalardan biri shartnoma imzolaganidan atigi o‘n kun o‘tib halok bo‘lgan. Boshqalar esa bedarak yo‘qolgan.

Guvohlarning so‘zlariga ko‘ra, ularning jasadlari topilmagan. Hozircha Rossiya tomoni ushbu holatlar bo‘yicha rasmiy izoh bermagan.

Mazkur voqealar Rossiyaning xorijlik fuqarolarni harbiy xizmatga jalb etish siyosati borasidagi tanqidlarni kuchaytirdi. Kuzatuvchilar fikricha, moliyaviy muammolarga duch kelgan talabalarni “tez boyish” va’dasi bilan urushga tortish inson hayotiga nisbatan beparvolikdir.

Bu kabi holatlar xalqaro miqyosda ham salbiy munosabatlarni kuchaytirmoqda.