Yaponiyada ayiqlar hujumlari kuchaydi, armiyaga topshiriq berildi

Yaponiyaning shimoliy hududlarida ayiqlar hujumlari keskin ko‘paygani bois hukumat favqulodda choralar ko‘rmoqda. Bu haqda Zamin.uz xabar berdi.

Associated Press axborotiga ko‘ra, joriy yilning aprel oyidan beri ayiqlar o‘nlab odamga hujum qilgan, natijada 12 kishi hayotdan ko‘z yumgan. Rasmiy ma’lumotlarga ko‘ra, yil boshidan buyon odamlar yashaydigan hududlarga 8 mingdan ortiq ayiqlar yaqinlashgan.

Bu ko‘rsatkich o‘tgan yilga nisbatan olti baravar ko‘pdir. Eng og‘ir vaziyat Akita prefekturasida kuzatilmoqda.

Hudud aholisi kechqurun uydan chiqishga qo‘rqib qolgan, o‘rmon yo‘llari esa huvillab qolgandek. Bosh vazir Sanae Takaiti vaziyatni nazorat qilish uchun armiyani safarbar qilishga qaror qildi.

Harbiylar qurolsiz, faqat qalqon, to‘r va maxsus spreylardan foydalanmoqda. Ularning asosiy vazifasi ayiqlarni tuzoqqa tushirish, ularni ushlash va ovchilarga yordam berishdan iborat.

Mutaxassislarning fikriga ko‘ra, ayiqlar hujumlarining ko‘payishiga iqlim o‘zgarishi va oziq-ovqat tanqisligi sabab bo‘lmoqda. Qishloq joylarda odamlar sonining kamayishi hayvonlarni yanada yaqinlashtirayotgan bo‘lsa, ovchilar sonining qisqarishi muammoni yanada murakkablashtirmoqda.