Gunvor "Lukoyl" aktivlarini sotib olishni o‘rganmoqda

Shveytsariyada joylashgan Gunvor neft savdo kompaniyasi Rossiyaning "Lukoyl" kompaniyasiga qarshi AQSh va Buyuk Britaniya tomonidan joriy etilgan yangi sanksiyalar ortidan "Lukoyl"ning xorijdagi aktivlarini sotib olish masalasini ko‘rib chiqmoqda. Bu haqda Zamin.uz xabar berdi.

Bu haqda Reuters axborot agentligi xabar berdi. Gunvor kompaniyasining umumiy kapitali 6,8 milliard dollarni tashkil etadi.

Kompaniyaning aktivlari asosan naqd mablag‘lardan iborat bo‘lib, zavod va uskunalar ulushi nisbatan kamroq. "Lukoyl" aktivlarini sotib olish uchun Gunvor kompaniyasi taxminan 18 milliard dollar miqdorida qarz olishga majbur bo‘ladi.

Ammo bu ko‘rsatkich mutaxassislar tomonidan deyarli imkonsiz deb baholanmoqda. Bunday katta miqdordagi qarz kompaniyaning kredit olish imkoniyatlarini keskin cheklashi mumkin.

Bundan tashqari, "Lukoyl"ning xorijiy aktivlari joylashgan mamlakatlarda bitimlar qat’iy tekshiruvlardan o‘tishi kutilmoqda. Shuningdek, Gunvorning Rossiya bilan ilgari bo‘lgan aloqalari ham xavfli omil sifatida qaralmoqda.

Ma’lumki, kompaniya avval Rossiya neftining yirik eksportchilaridan biri bo‘lgan, biroq hozirda e’tiborini AQSh va boshqa bozorlarga qaratmoqda. "Lukoyl"ning xorijdagi aktivlari taxminan 22 milliard dollar qiymatga ega.

Ular tarkibiga Yevropadagi neft zavodlari, Qozog‘iston, O‘zbekiston, Iroq va Meksikadagi qazib olish maydonlari, shuningdek, dunyo bo‘ylab yuzlab yoqilg‘i quyish shoxobchalari kiradi. Bu aktivlarning sotilishi va ularga bo‘lgan talab kelgusida ko‘plab muhokamalar va tekshiruvlarga sabab bo‘lishi mumkin.