Tramp Markaziy Osiyoni boy mintaqa deb atadi
AQSh prezidenti Donald Tramp «C5+1» sammiti davomida Markaziy Osiyoni «nihoyatda boy mintaqa» deb ta’kidladi. Bu haqda Zamin.uz xabar berdi.
U ayniqsa, Vashingtonning strategik ahamiyatga ega bo‘lgan minerallarga qiziqish bildirayotganini qo‘shimcha qildi. Reuters agentligining xabar berishicha, Tramp so‘nggi haftalarda AQSh iqtisodiy xavfsizligini mustahkamlash maqsadida butun dunyo bo‘ylab ittifoqchilar va hamkorlar bilan muhim minerallar ta’minotini kengaytirishga qaratilgan kelishuvlar imzolanganini ma’lum qilgan.
Agentlikning qayd etishicha, ayniqsa Markaziy Osiyoning mineral resurslari uchun raqobat tobora kuchaymoqda. G‘arb davlatlari xomashyo yetkazib berish yo‘llarini diversifikatsiya qilishni maqsad qilib olmoqda.
Shu bilan birga, AQSh muhim minerallar, energiya resurslari va savdo yo‘llarini raqobatchi davlatlarni chetlab o‘tadigan yo‘nalishlar orqali ta’minlash uchun yangi hamkorlarni qidirayotgani haqida ma’lumot berildi. O‘zbekiston prezidenti Shavkat Mirziyoyevning AQSh biznes vakillari bilan uchrashuvi davomida bir qator kelishuvlar imzolandi.
Xususan, Denali Exploration Group va Re Element Technologies kompaniyalari bilan noyob yer elementlari bo‘yicha hamkorlik kelishuvlariga erishildi. Bu hujjatlar ikki tomonlama iqtisodiy aloqalarni rivojlantirishga xizmat qiladi.
