Jakarta masjididagi portlashda 50 kishi jarohatlandi
Indoneziyaning poytaxti Jakarta shahrida juma namozi paytida portlash sodir bo‘ldi. Bu haqda Zamin.uz xabar berdi.
Mahalliy rasmiylarning ma’lumotiga ko‘ra, ushbu hodisa oqibatida kamida 50 dan ortiq kishi jarohat olgan. Voqea shaharning shimoliy qismidagi Kelapa Gading tumanida joylashgan 27-son davlat o‘rta maktabi masjidida yuz bergan.
Shu paytda masjidda asosan o‘quvchilar bo‘lgani sababli jabrlanganlarning aksariyati o‘smir yoshdagi bolalar ekani aytilmoqda. Dastlabki ma’lumotlarga ko‘ra, portlash masjiddagi ovoz kuchaytirgich tizimi yaqinida sodir bo‘lgan.
Ammo hozircha portlashning aniq sababi haqida rasmiy ma’lumot berilmagan. Taxminlarga ko‘ra, hodisaga elektr tizimidagi nosozlik yoki qo‘lda yasalgan portlovchi moslama sabab bo‘lishi mumkin.
Portlashdan so‘ng voqea joyiga tez yordam va qutqaruv xizmatlari yetib kelgan. Jarohat olganlar zudlik bilan yaqin atrofdagi shifoxonalarga yetkazilgan.
Politsiya hodisa bo‘yicha tergov ishlarini boshlaganini ma’lum qildi. Hozirda masjid atrofi yopilgan, xavfsizlik kameralari yozuvlari ko‘rib chiqilmoqda va guvohlar bilan so‘rov o‘tkazilmoqda.
Hodisaga nima sabab bo‘lgani hozircha noma’lum. Tegishli organlar tomonidan surishtiruv ishlari davom etmoqda.
