BMT Suriya rahbarlariga qo‘yilgan sanksiyalarni bekor qildi
Birlashgan Millatlar Tashkilotining Xavfsizlik Kengashi AQSh tomonidan ilgari surilgan rezolyutsiyani qabul qildi. Bu haqda Zamin.uz xabar berdi.
Ushbu rezolyutsiya asosida Suriya vaqtinchalik prezidenti Ahmad ash-Sharaa va ichki ishlar vaziri Anas Xattabga nisbatan avval qo‘llanilgan xalqaro sanksiyalar bekor qilindi. 6-noyabr kuni o‘tkazilgan ovoz berishda 14 davlat rezolyutsiya foydasiga ovoz berdi, faqat Xitoy vakili betaraf qoldi.
Ushbu qaror xalqaro hamjamiyat va Suriya o‘rtasida yangi munosabatlar davrini boshlab berishi kutilmoqda. Rezolyutsiyada Suriya Arab Respublikasining suvereniteti, mustaqilligi va hududiy yaxlitligini hurmat qilish zarurligi alohida ta’kidlangan.
Avvalroq Ahmad ash-Sharaa va Anas Xattabga nisbatan cheklovlar terrorchi tashkilotlar, jumladan, "Islomiy davlat" va "Al-Qoida" bilan bog‘liq shaxslar va tuzilmalar uchun joriy etilgan kengroq sanksiyalar doirasiga kiritilgan edi. Buyuk Britaniya, Rossiya, Fransiya va Pokiston vakillari bu qarorni Suriyani barqarorlashtirish va iqtisodiy tiklanish yo‘lida muhim qadam sifatida baholashdi.
Rasmiy Damashq esa bu qarorni yangi Suriya rahbariyatiga nisbatan xalqaro hamjamiyatning ishonchi o‘sib borayotganining belgisi sifatida talqin etdi. Suriya hukumati bu qaror mamlakatning xalqaro maydonga to‘liq qaytishiga zamin yaratishini ta’kidladi.
Rezolyutsiya AQSh va Suriya o‘rtasida muhim muzokaralar arafasida qabul qilindi. 10-noyabr kuni Ahmad ash-Sharaaning Vashingtonga ilk rasmiy tashrifi rejalashtirilgan.
Tashrif davomida AQSh prezidenti Donald Tramp bilan uchrashuv o‘tkazilishi kutilmoqda. Uchrashuvda asosiy mavzu Suriya va AQSh boshchiligidagi xalqaro koalitsiyaga qo‘shilish masalalari bo‘lishi taxmin qilinmoqda.
Bu koalitsiya "Islomiy davlat"ga qarshi kurashda muhim ahamiyat kasb etadi.
