Tramp har bir amerikalikka 2000 dollar va’da qildi
AQSh sobiq prezidenti Donald Tramp mamlakat bojxona to‘lovlaridan tushayotgan daromadlarni aholi bilan bo‘lishish rejasini e’lon qildi. Bu haqda Zamin.uz xabar berdi.
Unga ko‘ra, har bir amerikalik fuqaroga kamida 2000 dollar miqdorida “dividend” to‘lanishi mumkin. Bu haqda Tramp 9-noyabr kuni o‘zining Truth Social ijtimoiy tarmog‘idagi sahifasida yozib qoldirgan.
Trampning ta’kidlashicha, AQSh bojxona to‘lovlari orqali trillionlab dollar daromad olmoqda va ushbu mablag‘lar yordamida mamlakatning 37 trillion dollarlik davlat qarzini qisqartirish ham rejalashtirilgan. Shuningdek, u Amerika sanoati tiklanayotganini, zavod va fabrikalar qayta ishga tushayotganini qayd etgan.
Trampning fikricha, yuqori daromadga ega fuqarolar bundan mustasno, har bir amerikalikka kamida 2000 dollarlik to‘lov ajratilishi ko‘zda tutilgan. Biroq, Germaniyaning Dpa axborot agentligi xabar berishicha, Tramp ushbu taklifni ilgari ham bir necha bor tilga olgan, ammo hozirgacha amaliy mexanizm yoki qonunchilik tashabbusi ishlab chiqilmagan.
Mutaxassislar bu bayonotni siyosiy qadam sifatida baholamoqda. Trampning “nolga yaqin inflyatsiya” haqidagi da’volariga qaramay, rasmiy statistikaga ko‘ra, AQShda inflyatsiya darajasi hozirda 3 foiz atrofida.
Bundan tashqari, yirik shaharlarda, jumladan, Nyu-York va Los-Anjelesda uy-joy ijara narxlari hanuz yuqori darajada saqlanib qolmoqda. Moliya bozorlarida ham xavotirlar mavjud.
Xususan, sun’iy intellekt sohasida faoliyat yurituvchi yirik kompaniyalar aksiyalariga nisbatan “investitsiya pufagi” xavfi ortib bormoqda. Bu holat, Dpa agentligi xulosasiga ko‘ra, pensiya jamg‘armalari uchun jiddiy xavf tug‘dirishi mumkin, chunki aholining katta qismi ushbu aksiyalar orqali o‘z kelajagini ta’minlashga harakat qilmoqda.
Tramp esa o‘z chiqishlarida mamlakat iqtisodiy barqarorligini mustahkamlash va amerikalik ishchi tabaqaning manfaatlarini birinchi o‘ringa qo‘yishini ta’kidlamoqda. U bu rejaning asosiy maqsadi “oddiy fuqarolar uchun haqiqiy mukofot yaratish” ekanini qayd etdi.
