Olimlar 27-oktyabr kuni Moskva, Podmoskove shaharlari, Novgorod va Tver viloyatlari osmonidan uchib o‘tgan sirli obyektning dastlabki namunalarini topdilar. Bu haqda Zamin.uz xabar berdi.
Mazkur obyektning kelib chiqishi bo‘yicha olib borilgan munozaralar natijasida uning tosh meteorit, ya’ni LL6 guruhiga mansub oddiy xondritlardan biri ekani aniqlangan. Rossiya Fanlar akademiyasining Geokimyo va analitik kimyo instituti (GEOXI) tomonidan topilgan meteorit bo‘laklariga oid fotosuratlar e’lon qilindi.
Mutaxassislar tomonidan berilgan bayonotda obyekt meteorit ekanligi tasdiqlandi. Institut vakillarining ma’lum qilishicha, meteoritga rasmiy nom beriladi va u odatda obyekt tushgan joyning nomi bilan bog‘lanadi.
Meteoritga oid tadqiqotlar Rossiya Fanlar akademiyasining GEOXI meteorika va kosmokimyo laboratoriyasi mutaxassislari tomonidan amalga oshirilmoqda. Topilgan namunalarning bir qismi Dedovskdagi Dunyo tarixi muzeyida va Yekaterinburgdagi Ural Federal universitetida saqlanmoqda.
Shu bilan birga, meteoritning boshqa bo‘laklarini izlash ishlari davom ettirilmoqda. Ushbu sirli tosh jismlar koinotdan kelgan noyob obyektlar bo‘lib, ular ilmiy tadqiqotlar uchun muhim ahamiyatga ega.
Meteoritning kelib chiqishi va tarkibi bo‘yicha olib borilayotgan izlanishlar koinot sirlarini yanada chuqurroq o‘rganishga imkon beradi.
