Pokistonda sud yaqinidagi portlashda 12 kishi halok bo‘ldi
Pokistonda Tolibon harakati Islomoboddagi sud binosi yaqinida sodir etilgan portlash uchun javobgarlikni o‘z zimmasiga oldi. Bu haqda Zamin.uz xabar berdi.
AFP agentligining xabar berishicha, hodisa oqibatida kamida 12 kishi halok bo‘lib, 27 kishi jarohat olgan. Tolibon vakillarining ma’lum qilishicha, ular sud tizimi xodimlarini, jumladan, sudyalar, advokatlar va boshqa mansabdorlarni nishonga olishgan.
Ularning fikricha, bu shaxslar islomiy normalarga zid qonunlar asosida faoliyat yuritmoqda. Shuningdek, Tolibon vakillari mamlakatda shariat qoidalari to‘liq joriy etilmaguncha hujumlarni davom ettirishlarini ta’kidlashgan.
Portlash kunduzi yuz bergan. Pokiston Ichki ishlar vazirligiga ko‘ra, xudkush hujumchi avval sud binosiga kirishga uringan, biroq bunga muvaffaq bo‘la olmagan.
Portlovchi qurilma ko‘chada, politsiya xizmat mashinasi yaqinida portlagan. Avvalroq hukumat ushbu voqeani Tolibon harakati bilan bog‘lagan edi.
Biroq dastlab guruh rahbarlari ayblovlarni rad etishgan. Shu hodisadan oldin, 10-noyabr kuni Pokistonning shimoli-g‘arbida yana bir xudkush terror hujumi sodir bo‘lgandi.
U yerda qurollangan guruh harbiy kollej kursantlarini garovga olishga uringan, ammo xavfsizlik kuchlari operatsiya o‘tkazib, bu harakatni bartaraf etishga muvaffaq bo‘lgan. Ushbu hujum uchun ham Tolibon javobgar deb topilgan, ammo guruh vakillari bu voqeaga aloqadorliklarini rad etishgan.
