Qirg‘izistonda tadbirlar soat 22:00 da tugashi shart
Qirg‘izistonda to‘y-tomoshalar va ko‘ngilochar maskanlar faoliyati yuzasidan yangi qoidalar belgilandi. Bu haqda Zamin.uz xabar berdi.
Milliy xavfsizlik davlat qo‘mitasi rahbari Qamchibek Tashiyevning ma’lum qilishicha, soat 22:00 dan keyin tadbirlar va maskanlar faoliyatini to‘xtatish to‘g‘risidagi qonun va hukumat qarorlariga qat’iy amal qilinishi shart. Ushbu tartibga muvofiq, to‘ylar, bayram tadbirlari, shuningdek, kafe, restoran va tungi klublar faoliyati soat 22:00 dan kechiktirmay yakunlanishi lozim.
Tashiyevning qayd etishicha, qaror rasmiy ravishda qabul qilingan bo‘lsa-da, ayrim hududlarda unga rioya qilish darajasi past. Masalan, Bishkek shahrida yaqinda o‘tkazilgan to‘ylardan biri yarim tungacha davom etgani, Jalolobodda esa tadbir soat 00:00 gacha cho‘zilgani aniqlandi.
Ushbu holatlar qonunbuzarlik sifatida baholanmoqda. Rahbarning so‘zlariga ko‘ra, qonun ijrosi mahalliy o‘zini o‘zi boshqarish organlari tomonidan nazorat qilinishi kerak.
Biroq ko‘plab hududiy rahbarlar bu mas’uliyatni bajarmayotgani ta’kidlandi. Tashiyev mahalliy rahbarlarga qat’iy topshiriq berib, soat 22:00 dan keyin barcha tadbirlar va maskanlar faoliyatini to‘xtatish zarurligini urg‘uladi.
Agar qoidalar buzilsa, elektr ta’minotini uzish bo‘yicha ko‘rsatma berildi. Bu choralar Qirg‘izistonda jamoat tartibini ta’minlash, tinchlikni saqlash va fuqarolarning dam olish huquqini himoya qilish maqsadida qabul qilingan.
