Rubiales kitob taqdimotida tuxumli hujumga uchradi
Ispaniya Qirollik futbol federatsiyasining sobiq rahbari Luis Rubiales yana bir noqulay holatga tushib qoldi. Bu haqda Zamin.uz xabar berdi.
U yaqinda o‘zining kitob taqdimotini o‘tkazishga qaror qilgan edi, ammo tadbir davomida kutilmagan voqea yuz berdi. Kimdir unga chirigan tuxumlar uloqtirdi.
Keyinchalik ma’lum bo‘lishicha, bu ishni Rubialesning o‘z tog‘asi amalga oshirgan. Rubiales tog‘asini quvib chiqarishga urinib ko‘rdi, biroq atrofdagilar uni tinchlantirishga muvaffaq bo‘ldi va mojaroning jiddiylashishiga yo‘l qo‘ymadi.
Ushbu voqeani sharhlarkan, Rubiales jurnalistlarga “Yaxshiyamki, meni to‘xtatishdi, aks holda vaziyat qanday yakun topishini tasavvur qilish qiyin edi. Chunki u yerda boshqa odamlar ham bor edi”, dedi.
Shu bilan birga, Ispaniya ommaviy axborot vositalarida Rubialesning o‘zi bu voqeani rejalashtirgan bo‘lishi mumkinligi haqida taxminlar paydo bo‘ldi. Ayrim manbalarga ko‘ra, tog‘asining bu harakati Rubialesning mashhurligini oshirish va kitob taqdimotiga ko‘proq e’tibor qaratish maqsadida uyushtirilgan bo‘lishi ehtimoldan xoli emas.
Mazkur kitob Rubiales va Ispaniya terma jamoasi futbolchisi Jennifer Hermoso o‘rtasidagi mojaro haqida hikoya qiladi. Ushbu mojaro Rubialesning Hermosoni majburan o‘pishi ortidan yuzaga kelgan va katta jamoatchilik muhokamasiga sabab bo‘lgan edi.
