Oziq-ovqat isrofi ekologiyaga jiddiy zarar yetkazmoqda
Birlashgan Millatlar Tashkilotining ma’lumotlariga ko‘ra, insoniyat har yili 1 milliard tonnadan ortiq oziq-ovqatni isrof qilmoqda. Bu haqda Zamin.uz xabar berdi.
Bu holat nafaqat oziq-ovqat xavfsizligiga, balki sayyoramiz ekologiyasiga ham jiddiy zarar yetkazmoqda. Ma’lum bo‘lishicha, issiqxona gazlari chiqindilarining qariyb 10 foizi aynan oziq-ovqat isrofi hisobiga to‘g‘ri keladi.
Braziliyaning Belem shahrida o‘tkazilgan iqlim sammitida mutaxassislar bu muammo insoniyat uchun global tahdid ekanini yana bir bor ta’kidlashdi. Ularning fikricha, oziq-ovqat chiqindilariga qarshi kurashish ekologik barqarorlikni ta’minlash va kelajak avlodlarning xavfsizligini saqlashda muhim ahamiyatga ega.
Shu munosabat bilan Birlashgan Millatlar Tashkilotining Atrof-muhit bo‘yicha dasturi (UNEP) va xalqaro hamkorlar “Oziq-ovqat yo‘qotishlarini kamaytirish” tashabbusini yo‘lga qo‘ydi. Ushbu loyiha 2030 yilga borib oziq-ovqat isrofini ikki baravar qisqartirish, metan gazlari chiqindilarini kamaytirish va ochlik xavfini pasaytirishni maqsad qilgan.
UNEP rahbari Inger Andersenning so‘zlariga ko‘ra, oziq-ovqatni tejash boy va kambag‘al mamlakatlar uchun dolzarb vazifadir. Chunki oziq-ovqatni asrash nafaqat ochlikka qarshi kurashda, balki atmosferaga zararli gazlar chiqishini kamaytirishda ham muhim rol o‘ynaydi.
Global ekologik jamg‘arma tomonidan qo‘llab-quvvatlanayotgan yangi dastur mamlakatlar va shaharlar uchun oziq-ovqat isrofini kamaytirish yo‘lida samarali strategiyalar ishlab chiqishda yordam beradi. Shuningdek, rivojlanayotgan davlatlarda sinovdan o‘tgan tajribalarni moslashtirish va kengaytirishga xizmat qiladi.
Mutaxassislarning fikricha, oziq-ovqatni tejash faqat iqtisodiy foyda keltiribgina qolmay, balki insoniyatning mas’uliyatli yondashuvini ham ifodalaydi. Chunki har bir isrof qilingan mahsulot — issiqlikni oshiruvchi gazlar, chiqindilarning ko‘payishi va ochlik muammosining kuchayishi demakdir.
