AQSh Rossiya va Eron savdosiga sanksiyalar rejalashtirmoqda
AQSh prezidenti Donald Tramp Respublikachilar partiyasi vakillari Rossiyaning savdo hamkorlariga qarshi sanksiyalarni ko‘zda tutuvchi qonun loyihasi ustida ishlayotganini ma’lum qildi. Bu haqda Zamin.uz xabar berdi.
U ushbu tashabbusni ijobiy baholab, "Respublikachilar juda kuchli qonun loyihasini ishlab chiqmoqda", — deya ta’kidladi. Trampning so‘zlariga ko‘ra, mazkur hujjatga Eron ham kiritilishi rejalashtirilgan.
Rossiya savdo hamkorlariga 500 foizlik bojlar joriy etish g‘oyasi bu yil bahorda senatorlar Lindsi Grexem va Richard Blyumental tomonidan taklif qilingan edi. Yozda senator Grexem AQSh prezidenti mazkur bojlarni qo‘llab-quvvatlashini bildirgan.
Biroq keyinchalik Tramp 500 foizlik bojlarning zarur emasligini, 100 foizlik bojning o‘zi yetarli ekanini ta’kidladi. Rossiya O‘zbekistonning asosiy savdo hamkorlaridan biri hisoblanadi.
2025 yilning to‘qqiz oyi davomida ikki davlat o‘rtasidagi savdo hajmi 9,4 milliard dollardan oshgan bo‘lsa, o‘tgan yilning shu davrida bu ko‘rsatkich 8,6 milliard dollarni tashkil etgan edi. Shu bilan birga, joriy yilning yanvar-sentabr oylarida O‘zbekiston va AQSh o‘rtasidagi savdo hajmi 719,1 million dollarga yetgan, o‘tgan yilning xuddi shu davrida esa bu ko‘rsatkich 681 million dollarni tashkil qilgan.
Eron bilan savdo hajmi esa mos ravishda 393,3 million va 359,1 million dollarni tashkil qilgan.
