Bangladesh sobiq bosh vaziriga o‘lim jazosi berildi
Bangladesh sudi mamlakatning sobiq bosh vaziri Sheyx Xasinani insoniyatga qarshi jinoyatlar sodir etganlikda aybdor deb topib, unga o‘lim jazosi hukmini chiqardi. Bu haqda Zamin.uz xabar berdi.
Ma’lum qilinishicha, Sheyx Xasina va uning yaqin hamkorlari 2024 yilda mamlakat bo‘ylab avj olgan ommaviy norozilik namoyishlarini kuch bilan bostirishda aybdor deb topilgan. Ushbu namoyishlar keyinchalik inqilobga aylanib, mamlakatda jiddiy siyosiy inqirozga olib kelgan.
Sheyx Xasina o‘zining 15 yillik boshqaruvi davomida avtoritar siyosat yuritgan va bu davrda ko‘plab qonli hodisalar yuz bergan. Birlashgan Millatlar Tashkiloti ma’lumotlariga ko‘ra, uning boshqaruvi davridagi qatag‘onlar natijasida taxminan 1400 nafar fuqaro halok bo‘lgan.
Sud jarayoni bir necha oy davom etgan va ko‘plab guvohlarning masofadan turib bergan ko‘rsatmalari tinglangan. Guvohlar Sheyx Xasinani norozilik bildirgan fuqarolarni ommaviy ravishda yo‘q qilishga buyruq berganlikda ayblagan.
Hukumatdan ag‘darilgach, Sheyx Xasina Hindistonga qochib, u yerda boshpana topgan. U sud hukmini tan olmay, barcha ayblovlarni rad etmoqda.
