AQSh Markaziy Osiyoda C6+1 formatini qo‘llab-quvvatlamoqda
Oq uy Markaziy Osiyoni Amerika Qo‘shma Shtatlarining tashqi siyosatidagi ustuvor yo‘nalishlardan biri sifatida e’lon qildi. Bu haqda Zamin.uz xabar berdi.
Bu haqda Atlantika kengashining Yevroosiyo markazi rahbari Jon Herbst AQSh va Ozarbayjon tahliliy markazlari tomonidan tashkil etilgan birinchi forumda ma’lum qildi. Mazkur qarorga muvofiq, Vashington C5+1 platformasini Ozarbayjon ishtirokida C6+1 formatiga kengaytirishni qo‘llab-quvvatlamoqda.
Jon Herbstning ta’kidlashicha, Toshkentda o‘tgan sammitda mintaqa davlatlari Ozarbayjonni C6 formatiga qo‘shilishga taklif etish haqida qaror qabul qilgan. Bu esa Bokuning mintaqaviy siyosatda tobora muhim ahamiyat kasb etayotganini ko‘rsatadi.
AQShning Markaziy Osiyo bilan aloqalarini yanada mustahkamlashga intilayotgani va bu jarayonda Ozarbayjonning ishtirokini kengaytirishga e’tibor qaratayotgani mintaqaviy hamkorlikni rivojlantirishga xizmat qilishi kutilmoqda. Shu tariqa, C6+1 formati mintaqa davlatlari o‘rtasida yangi imkoniyatlar ochishini ko‘rsatmoqda.
