Yaponiya dunyoning eng ardoqli mamlakati deb topildi
Wanderlust jurnali tomonidan har yili tashkil etiladigan Readers’ Choice Awards (RCA) tanlovi dunyo turizmi bo‘yicha eng yaxshi yo‘nalishlar va brendlarni aniqlab beradi. Bu haqda Zamin.uz xabar berdi.
Bu yilgi tanlovda ham 200 mingdan ortiq sayohat ixlosmandlari ishtirok etib, yilning eng ardoqli mamlakatlarini aniqlashdi. Mazkur mukofot turizm sohasida o‘z o‘rnini mustahkamlagan eng yaxshi yo‘nalishlar va turoperatorlarga topshiriladi.
Bu yilgi tanlovda Yaponiya “Eng ardoqli mamlakat” unvoniga sazovor bo‘ldi. Qiziqarli jihati shundaki, Yaponiya so‘nggi marta bunday e’tirofni o‘n yil oldin qo‘lga kiritgan edi.
Ushbu davlatning mashhurligi sababi uning sayyohlik imkoniyatlari xilma-xilligida: qumli plyajlar, tinch tog‘ manzaralari, boy tarix va madaniyat, shuningdek, zamonaviy megapolislar va dunyoga mashhur tematik bog‘lar — barchasi Yaponiyada mujassam. Tokio va Kioto kabi shaharlari sayyohlar orasida eng mashhur manzillar bo‘lib qolmoqda.
Shu bilan birga, sayohatchilar Shikoku qirg‘oqlari, Kanazava ustalari manzili va Yaponiyaning chekka orollarini ham kashf etmoqda. Ayniqsa, Tokioning Dzimbotyo hududi kitobsevarlar uchun alohida diqqatga sazovor joy hisoblanadi.
Ikkinchi o‘rinni Kosta-Rika egalladi. Ushbu mamlakat o‘zining boy tabiati va yovvoyi hayvonot olami bilan mashhur.
Osa yarimoroli esa dunyodagi eng kam baholangan, ammo e’tiborga loyiq eko-sarguzasht manzillaridan biri hisoblanadi. Uchinchi o‘rinni esa Kanada qo‘lga kiritdi.
Keng hududlari, betakror tabiiy go‘zalligi va rang-barang sayyohlik maskanlari bilan Kanada millionlab sayyohlarni jalb qilmoqda. Dunyoda eng ardoqli deb topilgan 10 davlat quyidagicha: Yaponiya, Kosta-Rika, Kanada, Avstraliya, Peru, Janubiy Afrika, AQSH, Yangi Zelandiya, Braziliya va Ekvador.
Ushbu ro‘yxatdan ko‘rinib turibdiki, tabiat, tarix va madaniy boyliklarga ega mamlakatlar sayyohlar uchun yanada jozibador bo‘lib bormoqda.
