Germaniya sudi Alisher Usmonov aybsizligini tasdiqladi

Germaniyaning Gamburg shahar sudi rossiyalik tadbirkor Alisher Usmonov va uning singlisi Saodat Narziyevaga qarshi ilgari surilgan ayblovlarni asossiz deb topdi. Bu haqda Zamin.uz xabar berdi.

Bu haqda Usmonovning advokati Yoaxim Shtaynxefel ma’lum qildi. Sud qaroriga ko‘ra, Germaniya fuqarosi Facebook ijtimoiy tarmog‘ida Alisher Usmonov o‘z mablag‘larini Shveytsariyadagi bank hisobida yashirib, ularni singlisi Saodat Narziyeva nomiga rasmiylashtirganini iddao qilgan.

Biroq sud ushbu da’volar haqiqatga mos emasligini tasdiqladi. Advokatning so‘zlariga ko‘ra, sud Usmonov va uning qarindoshlariga nisbatan bildirilgan ayblovlar faktlar bilan tasdiqlanmaganini yana bir bor qayd etdi.

Shuningdek, Yevropa Ittifoqi Saodat Narziyevani sanksiyalar ro‘yxatidan chiqarib, uni noto‘g‘ri kiritilganligi uchun kechirim so‘radi. Tadbirkorning vakillari 2022 yilda tarqatilgan shunga o‘xshash asossiz ma’lumotlar Yevropa Ittifoqi va Buyuk Britaniya tomonidan Saodat Narziyevaga nisbatan sanksiyalar joriy etilishiga olib kelganini ma’lum qilishdi.

Joriy yilning sentabr oyida Facebookda yana bir bor Saodat Narziyeva "Credit Suisse" bankidagi hisoblarning manfaatdori ekanligi haqida yolg‘on ma’lumot tarqatilgan. Biroq sud bu da’volarni asossiz deb topib, bunday ma’lumotlarni tarqatishni taqiqladi.

Ushbu taqiqni buzish 250 ming yevrogacha jarima yoki ma’muriy qamoq jazosi bilan jazolanishi mumkin.