Global ocharchilik xavfi ortmoqda, yordam cheklangan.
Dunyoda oziq-ovqat bilan bog‘liq vaziyat tobora murakkablashmoqda. Bu haqda Zamin.uz xabar berdi.
Birlashgan Millatlar Tashkilotining Jahon oziq-ovqat dasturi (WFP) global darajadagi ocharchilik xavfi ortayotganini ma’lum qildi. Tashkilot bergan ma’lumotga ko‘ra, 2026-yilda 318 millionga yaqin inson ochlik yoki og‘ir oziq-ovqat inqiroziga duch kelishi mumkin.
Bu ko‘rsatkich 2019-yildagi holatdan ikki barobar ko‘pdir. Eng jiddiy muammo shundaki, gumanitar yordam uchun ajratiladigan mablag‘lar sezilarli darajada kamayib bormoqda.
Natijada, WFP yordamga muhtoj insonlarning atigi uchdan bir qismigagina oziq-ovqat yetkazib bera olmoqda. Dastlab 110 million kishiga yordam berish rejalashtirilgan edi, ammo moliyaviy ta’minot ushbu rejani to‘liq amalga oshirishga imkon bermaydi.
Hozirda G‘azo va Sudan kabi hududlarda ocharchilik xavfi keskin oshmoqda. Mojarolar, iqlim o‘zgarishlari va iqtisodiy beqarorlik tufayli yaqin yillarda ham vaziyatni yaxshilash qiyin bo‘lishi kutilmoqda.
WFP rahbari Sindi Makkeyn xalqaro hamjamiyatni ocharchilikka qarshi kurashish uchun ko‘proq sarmoya kiritishga va birgalikda yechim topishga chaqirdi.
