Indoneziyada ko‘chki: 30 kishi halok, 40 bedarak
Indoneziyaning Markaziy Yava provinsiyasida 21-noyabr kuni kuchli ko‘chki yuz berdi. Bu haqda Zamin.uz xabar berdi.
Rasmiy ma’lumotlarga ko‘ra, kuchli yomg‘irlar natijasida yuzaga kelgan ushbu tabiiy ofat oqibatida kamida 30 kishi halok bo‘lgan, yana 40 nafar fuqaro bedarak yo‘qolgan deb hisoblanmoqda. Bu haqda mamlakatning tabiiy ofatlar oqibatlarini yumshatish agentligi vakili Abdul Muhari ma’lumotlariga asoslangan holda “Reuters” xabar tarqatdi.
Ko‘chki Chilakap shahri va Banjarnagara tumanida bir necha hududlarga zarar yetkazgan. Abdul Muharining ta’kidlashicha, o‘nlab xonadonlar jiddiy shikastlangan, 900 dan ortiq aholi xavfsiz joylarga evakuatsiya qilingan.
Ayrim joylarda yer qatlamining siljishi natijasida binolar qisman yoki to‘liq vayron bo‘lgan. Qidiruv-qutqaruv ishlari davom etmoqda, ammo jarayon qator muammolar bilan kechmoqda.
Ko‘chki oqibatida hosil bo‘lgan chiqindilar, suvning oqib ketishi va yana yog‘ingarchilik kutilayotgani qutqaruv ishlarini qiyinlashtirmoqda. Abdul Muhari yangi ko‘chkilar xavfi yuqori ekanini ta’kidlab, barcha ishlar ehtiyotkorlik bilan olib borilayotganini ma’lum qildi.
Qidiruv ishlari davomida kamida 700 nafar qutqaruvchi, shu jumladan politsiya va harbiylar ham ishtirok etmoqda. Ushbu jarayon kelasi haftagacha davom etishi kutilmoqda.
Indoneziyada yomg‘ir mavsumi sentyabr oyida boshlangan va meteorologlarning taxminiga ko‘ra, kelasi yil apreligacha davom etadi. Bu esa mamlakatning ko‘plab hududlarida toshqinlar va kuchli yog‘ingarchilik xavfini oshirishi mumkin.
