O‘zbekiston dunyoning eng xavfsiz davlatlari qatorida
Avstraliyaning Iqtisodiyot va tinchlik instituti tomonidan e’lon qilingan 2025 yilgi “Global terrorizm indeksi”da O‘zbekiston dunyodagi eng xavfsiz davlatlar qatoridan o‘rin oldi. Bu haqda Zamin.uz xabar berdi.
Mazkur reytingda mamlakatimiz terrorchilik xavfi bo‘yicha 90-o‘rinda qayd etilgan. Bu ko‘rsatkich orqali O‘zbekiston xavfsizlik darajasida bir qator rivojlangan davlatlarni ortda qoldirgan.
Hisobotga ko‘ra, O‘zbekiston AQSH, Kanada, Buyuk Britaniya, Fransiya, Germaniya, Ispaniya kabi davlatlar, shuningdek, Rossiya, Xitoy, Tojikiston, Birlashgan Arab Amirliklari va Turkiyaga nisbatan xavfsizroq deb baholangan. Markaziy Osiyo davlatlari orasida esa Turkmaniston, Qozog‘iston va Qirg‘iziston 100-o‘rin atrofida qayd etilgan.
Biroq hisobotda dunyo bo‘ylab terrorchilik tahdidi yomonlashayotgani ta’kidlangan. Terrorchilik hujumlari kuzatilgan davlatlar soni 58 tadan 66 taga oshgan.
G‘arb mamlakatlarida hujumlar soni 63 foizga ko‘paygan. Jumladan, Shvetsiya, Avstraliya, Finlyandiya, Niderlandiya, Daniya va Shveysariyada so‘nggi besh yilda ilk bor terrorchilik hujumlari sodir etilgan.
Yevropada eng qiyin vaziyat Germaniyada kuzatilgan. Magdeburg yarmarkasidagi hujum ortidan mamlakat 27-o‘ringa tushgan va yuqori xavfli hududlar qatoriga kiritilgan.
Eng xavfli davlatlar ro‘yxatida esa Burkina-Faso, Pokiston, Suriya va Isroil joy olgan. Bu mamlakatlarda terrorchilik tahdidi eng yuqori darajada baholangan.
