Braziliyaning Belen shahrida o‘tkazilgan Cop30 iqlim anjumanida rivojlanayotgan davlatlarga iqlim o‘zgarishi oqibatlariga qarshi kurash uchun qo‘shimcha moliyaviy yordam ajratish bo‘yicha kelishuvga erishildi. Bu haqda Zamin.uz xabar berdi.
Yakuniy hujjatda Yevropa Ittifoqi tomonidan ilgari surilgan qazilma yoqilg‘idan voz kechish bo‘yicha taklif o‘z aksini topmadi. Kelishuvga ko‘ra, iqlim bo‘yicha harakatlarni tezlashtirish uchun ixtiyoriy tashabbus yo‘lga qo‘yiladi.
Shuningdek, rivojlangan davlatlar 2035-yilgacha iqlim o‘zgarishiga moslashish uchun ajratiladigan mablag‘larni kamida uch baravar oshirishga chaqirildi. Hujjatda xalqaro savdo mexanizmlarini iqlim maqsadlariga muvofiqlashtirish uchun qayta ko‘rib chiqish rejalari ham belgilangan.
Rivojlanayotgan davlatlar dengiz sathining ko‘tarilishi, yuqori harorat, qurg‘oqchilik va suv toshqinlari kabi xavflar kuchaygani sababli moliyaviy yordamni oshirishni talab qilmoqda. Shu bilan birga, qazilma yoqilg‘idan voz kechish masalasi bo‘yicha kelishmovchiliklar davom etdi.
Saudiy Arabistoni kabi ayrim davlatlarning qarshiligi sababli mazkur masala Braziliya tomonidan alohida qo‘shimcha hujjatda aks ettirildi. AQSh ushbu sammitga rasmiy delegatsiya yubormagan bo‘lsa-da, konferensiya ishtirokchilari iqlim masalalarida birdamlikni saqlashga intilayotganliklarini ta’kidladilar.
