Kaspiy dengizi suv sathi pasayishda davom etadi

Ozarbayjon Fanlar akademiyasining Geografiya instituti mutaxassislari Kaspiy dengizida suv sathining pasayishi vaqtinchalik hodisa emasligini ta’kidlashmoqda. Bu haqda Zamin.uz xabar berdi.

Ularning fikriga ko‘ra, bu jarayon mintaqaning kelajakdagi geografik ko‘rinishini o‘zgartirishi mumkin bo‘lgan keng ko‘lamli geodinamik jarayonlarning bir qismi hisoblanadi. Mazkur holat haqida Minval axborot portali xabar berdi.

Olimlar suvning chekinishini faol tektonik jarayonlar bilan bog‘lab, Kaspiy dengizining geologik o‘zgarishlar zonasida joylashganini qayd etmoqda. Ularning aytishicha, Kavkaz tog‘larining o‘sishi davom etayotgani sababli mintaqadagi tektonik faollik kuchaymoqda va bu suv sathining yildan yilga pasayishiga olib kelmoqda.

Institut ilmiy xodimi Mirnux Ismoilovning so‘zlariga ko‘ra, Kaspiy dengizining tektonik mintaqada joylashgani va tog‘ hosil bo‘lish jarayonining hali tugallanmagani sababli suv sathi pasayishda davom etadi. U bu jarayon uzoq vaqt davom etishini ta’kidladi.

Olimning fikricha, agar hozirgi dinamika saqlansa, kelajakda Kaspiy dengizi ikkita alohida suv havzasiga bo‘linib ketishi mumkin. Ular shimolda Darband botig‘i va janubda Lyankaran botig‘i bo‘lishi ehtimol qilinmoqda.

Shuningdek, institutning yana bir xodimi Elnur Jafarov dengiz sathining pasayishi natijasida qirg‘oq chizig‘i 30 kilometrgacha orqaga chekinishi mumkinligini ma’lum qildi. Mutaxassislarning qayd etishicha, agar bu jarayon davom etsa, Kaspiy dengizi atrofidagi ekologik muhit, bandlik va iqtisodiy faoliyatga jiddiy ta’sir ko‘rsatishi mumkin.