Senatorning burqa kiyib parlamentga kirishi tanqidga uchradi
Avstraliya parlamentida senator Polin Xansonning burqa kiyib kirishi jiddiy muhokamalarga sabab bo‘ldi. Bu haqda Zamin.uz xabar berdi.
Ma’lum bo‘lishicha, senator yuqori palataga burqa kiyib kirgani uchun bir haftalik jazoga tortilib, uning faoliyati vaqtincha cheklangan. Reuters axborot agentligi xabar berishicha, Xanson burqani “hurmatsiz va nomunosib” tarzda taqqan, bu esa parlament a’zolarining keskin tanqidiga uchragan.
24-noyabr kuni senator jamoat joylarida burqa va yuzni yopuvchi boshqa kiyimlarni taqiqlashga qaratilgan qonun loyihasini muhokamaga qo‘yishga ruxsat ololmaganidan so‘ng, norozilik sifatida burqa kiyib parlamentga kirgan. Bu harakat musulmon qonun chiqaruvchilar tomonidan “irqchilik va haqorat” sifatida baholandi.
Avstraliya tashqi ishlar vaziri Penni Vong senatorning bu harakatini keskin qoraladi va uni “ijtimoiy birdamlikka zarar yetkazuvchi” hamda “e’tiqodni masxara qilish” deb atadi. Polin Xanson esa o‘z pozitsiyasidan voz kechmasligini ma’lum qilib, parlamentda kiyim bo‘yicha hech qanday cheklov yo‘qligini ta’kidladi.
Eslatib o‘tamiz, Xanson ilgari ham islomiy kiyimlarga qarshi chiqishlari bilan tanilgan. 2017 yilda ham u parlamentga burqa kiyib kirib, mamlakat bo‘ylab bu kiyimni to‘liq taqiqlashni talab qilgan edi.
Bu kabi harakatlar Avstraliyada ijtimoiy birdamlik va diniy hurmat masalalarini yana bir bor kun tartibiga olib chiqmoqda.
