Birlashgan Millatlar Tashkilotining Narkotiklar va jinoyatchilik bo‘yicha boshqarmasi hamda “BMT-ayollar” tuzilmasi 25-noyabr — Xotin-qizlarga nisbatan zo‘ravonlikka barham berish xalqaro kuni munosabati bilan maxsus hisobot e’lon qildi. Bu haqda Zamin.uz xabar berdi.
Ushbu hisobot ayollarga nisbatan zo‘ravonlik va qotillik holatlari bo‘yicha jiddiy tashvish uyg‘otmoqda. 2025-yilgi femitsid (ayollarning qasddan o‘ldirilishi) bo‘yicha ma’lumotlarga ko‘ra, 2024-yilda dunyo bo‘ylab 83 ming ayol va qiz ataylab o‘ldirilgan.
Hisobotda keltirilishicha, har kuni 137 ayol, ya’ni har 24 soatda, o‘zining turmush o‘rtog‘i yoki yaqin qarindoshi tomonidan hayotdan mahrum bo‘lmoqda. Ushbu qotilliklarning 60 foizi, ya’ni 50 mingdan ortig‘i jinsiy sheriklar yoki oila a’zolari tomonidan sodir etilgan.
Qiyoslash uchun aytish mumkinki, erkaklar orasida bu ko‘rsatkich 11 foizni tashkil qiladi. Dunyoning barcha mintaqalarida gender asosidagi qotilliklar kuzatilmoqda.
Eng yuqori ko‘rsatkich Afrikada qayd etilgan — har 100 ming ayolga 3 ta holat to‘g‘ri keladi. Shuningdek, Amerika (1,5), Okeaniya (1,4), Osiyo (0,7) va Yevropada (0,5) ham bu raqamlar xavotirli darajada.
BMT ushbu masalani keskin tanqid qilib, ayollar xavfsizligini ta’minlash uchun barcha davlatlarni real choralar ko‘rishga chaqirdi. Tashkilot vakillari gender tengligini ta’minlash va ayollarga nisbatan zo‘ravonlikni to‘xtatish bo‘yicha jiddiy sa’y-harakatlar zarurligini ta’kidlamoqda.
