Afg‘onistonda ayollarga nisbatan zo‘ravonlik keskin oshgani haqida BMTning Afg‘onistondagi yordam missiyasi (UNAMA) tomonidan e’lon qilingan hisobotda ma’lum qilindi. Bu haqda Zamin.uz xabar berdi.
Hisobotga ko‘ra, so‘nggi ikki yil ichida mamlakatda ayollarga nisbatan zo‘ravonlik darajasi 40 foizga oshgan. Mamlakatdagi 14,2 million ayol, ya’ni deyarli barcha ayollar gumanitar yordam va qo‘llab-quvvatlashga muhtoj ekani ta’kidlangan.
UNAMA hisobotida aytilishicha, afg‘on ayollari huquqlarining buzilishi ularni kundalik hayotda jismoniy, ruhiy va iqtisodiy xavflarga duchor qilmoqda. UNAMA rahbariyati vakili Jorjette Gagnonning fikricha, zo‘ravonlik nafaqat ko‘rinadigan tahdid, balki ayollarning ovozini o‘chirish va ularning imkoniyatlarini cheklashga qaratilgan harakatdir.
BMT xalqaro hamjamiyatni afg‘on ayollari bilan birdamlikni kuchaytirishga va ularga ko‘proq yordam ko‘rsatishga chaqirdi. Ma’lumotlarga ko‘ra, 2021-yilda “Tolibon” hokimiyatga kelganidan so‘ng ayollar va qizlarga nisbatan ko‘plab cheklovlar joriy etilgan.
Afg‘oniston hozirda qizlar oltinchi sinfdan keyin ta’lim ololmaydigan yagona davlat sifatida qolmoqda.
