Donald Tramp ma'muriyati tomonidan ishlab chiqilgan Ukrainadagi tinchlik rejasi va Kiyev rasmiylarining pozitsiyalari o‘rtasida sezilarli farqlar mavjud. Bu haqda Zamin.uz xabar berdi.
Bu haqda 26-noyabr kuni Amerika telekanali CNN muzokaralar jarayonidan xabardor yuqori martabali manbaga tayanib xabar berdi. Rejaning 28 bandining ko‘pchiligi bo‘yicha kelishuvga erishilgan bo‘lsa-da, tomonlar fikri uchta muhim masalada jiddiy farq qilmoqda.
Asosiy kelishmovchiliklardan biri Donbassdagi ayrim hududlarni Rossiya nazoratiga o‘tishi nazarda tutilgan demilitarizatsiya zonasi tashkil etish masalasidir. AQSH Ukraina rasmiylaridan ushbu zonani qabul qilishni so‘ragan.
Ukraina manbalariga ko‘ra, bu borada ayrim siljishlar kuzatilgan, ammo yakuniy kelishuvga erishilmagan. Yana bir muhim masala Ukraina Qurolli Kuchlari sonini 600 ming kishiga cheklash taklifidir.
AQSH bu borada o‘z pozitsiyasini bildirmoqda, biroq Kiyev bu g‘oyani hali qo‘llab-quvvatlashga tayyor emas. Uchinchidan, Ukraina NATOga a’zolikdan voz kechishni istamayapti.
Manbalarga ko‘ra, bunday qaror Rossiyaga alyansga yangi a’zolarni qabul qilishga doimiy to‘sqinlik qilish imkonini yaratgan bo‘lardi. Bu masala Ukraina uchun "qizil chiziq" hisoblanadi, Moskva esa bu talabni asosiy shart sifatida ko‘rib kelmoqda.
CNN ta’kidlashicha, ushbu uchta masala tinchlik muzokaralarining hal qiluvchi jihatlarini tashkil etadi. Ukraina prezidenti ofisi rahbari Andrey Yermakning so‘zlariga ko‘ra, prezident Vladimir Zelenskiy yaqin kunlarda Donald Tramp bilan uchrashib, urushni to‘xtatish bo‘yicha murosaga erishishni rejalashtirmoqda.
