Gonkongdagi yong‘inda 65 kishi halok bo‘ldi.

Gonkongdagi Wang Fuk Court turar-joy majmuasida yuz bergan yong‘in oqibatida halok bo‘lganlar soni 65 nafarga yetgani haqida mahalliy ommaviy axborot vositalari xabar berdi. Bu haqda Zamin.uz xabar berdi.

Shuningdek, taxminan 70 nafar fuqaroga shifoxonada tibbiy yordam ko‘rsatilmoqda. Hukumat vakillarining ma’lum qilishicha, yong‘in tez tarqalishiga ta’mirlash ishlari davomida foydalanilgan yonuvchan polistirol material sabab bo‘lgan.

Ushbu hodisa yuzasidan politsiya uch nafar pudrat tashkiloti xodimini e’tiborsizlik va noto‘g‘ri boshqaruv oqibatida odamlarning halok bo‘lishiga sababchi bo‘lganlikda gumon qilib qo‘lga oldi. Hozirgacha taxminan 280 kishining taqdiri noma’lum bo‘lib, ular bilan aloqa o‘rnatilmagan.

Qidiruv va qutqaruv ishlari davom etmoqda. Gonkong hukumati barcha davlat turar-joy majmualarida olib borilayotgan ta’mirlash ishlarini zudlik bilan tekshirishni buyurdi.

Bu chora kelgusida bunday fojialarning oldini olish maqsadida amalga oshirilmoqda.