Korrupsiyadan olingan mulk qarindoshlardan ham musodara qilinadi
Rossiya Konstitutsiyaviy sudi korrupsionerlarning qarindoshlari va uchinchi shaxslarga tegishli mol-mulk, jumladan, yagona turar joyni musodara qilishni qonuniy deb topdi. Bu haqda Zamin.uz xabar berdi.
Ushbu qaror mol-mulk qisman qonuniy mablag‘lar evaziga sotib olingan taqdirda ham o‘z kuchida qoladi. Korrupsiyaga aloqador shaxslarning yaqinlari, jumladan, farzandlari ham javobgarlikka tortilishi mumkin.
Masalan, Orenburg viloyatining sobiq ta’lim vaziri Vyacheslav Labuzovning qizi Yelena Labuzova otasi noqonuniy mablag‘ evaziga sotib olgan yerga uy qurdi. Biroq sud ushbu uyni noqonuniy yo‘l bilan qo‘lga kiritilgan mol-mulk sifatida musodara qildi.
Shuningdek, boshqa bir holatda Olga Korol pora sifatida olgan kvartiralarni kuyovi nomiga rasmiylashtirganiga qaramay, sud bu mulklarni ham musodara qildi. Sudning qat’iy pozitsiyasiga ko‘ra, korrupsiya natijasida olingan mol-mulk kimning nomida bo‘lishidan qat’i nazar, musodara qilinishi shart.
Sud bunday mulklarni saqlab qolish korrupsiyaga rag‘bat uyg‘otishi mumkinligini ta’kidladi. 2024 yil oktyabr oyida qabul qilingan qarorga muvofiq, korrupsiyadan kelib chiqqan mol-mulkni o‘zgartirish yoki ko‘paytirish uning musodara qilinishiga to‘sqinlik qilmaydi.
Huquqshunoslar bu qaror korrupsiyaga qarshi kurashni kuchaytirishini, ammo qarindoshlar uchun katta xavf tug‘dirishini aytmoqda. Agar ular korrupsiyadan kelgan mablag‘ning qonuniyligini tekshirmasalar, o‘z mol-mulkidan ayrilishi mumkin.
Sud qaroriga ko‘ra, hatto yagona turar joy ham musodara qilinishi mumkin. Shu bois, korrupsiya bilan bog‘liq har qanday mol-mulkka ehtiyotkorlik bilan yondashish lozim.
