Gonkong shahrida sodir bo‘lgan yirik yong‘in oqibatida kamida 94 nafar odam halok bo‘ldi, 80 dan ortiq kishi, jumladan o‘t o‘chiruvchilar, turli darajada jarohat oldi. Bu haqda Zamin.uz xabar berdi.
Mahalliy ommaviy axborot vositalarining 28-noyabr kuni bergan ma’lumotiga ko‘ra, yong‘in Tay Po tumanidagi turar joy majmuasida yuzaga kelgan va katta talafotlarga olib kelgan. Yong‘in 26-noyabr kuni boshlangan bo‘lib, u bambukdan yasalgan qurilish to‘siqlari orqali tez tarqalgan va bir nechta baland binolarga o‘tgan.
Yong‘in Wang Fuk Court majmuasining sakkizta binosidan beshtasini qamrab olgan. Qurbonlar orasida bir nafar o‘t o‘chiruvchi ham bor.
U yong‘inni o‘chirish paytida o‘z jamoasi bilan aloqa uzilib qolgan va keyinchalik kuyish izlari bilan topilgan. Hukumat ushbu yong‘inga eng yuqori — 5-darajali xavf kategoriyasini belgiladi.
Bu so‘nggi 16 yil ichida Gonkongdagi eng jiddiy yong‘inlardan biri hisoblanadi. O‘t o‘chirish xizmati vakillarining ta’kidlashicha, shamol va havodagi parchalar alangani tez yoyilishiga sabab bo‘lgan.
Yong‘inning aniq sababi hali rasman e’lon qilinmagan bo‘lsa-da, mahalliy aholining aytishicha, yaqin atrofdagi ishchilarning chekish odati xavfsizlikka tahdid solgan bo‘lishi mumkin. Voqea yuzasidan tergov ishlari olib borilmoqda.
Uch nafar erkak ehtiyotsizlik sabab o‘limga olib kelishda gumon qilinib, hibsga olingan. Gonkong aholi zich yashaydigan shaharlardan biri bo‘lib, ilgari yirik yong‘inlar tez-tez sodir bo‘lar edi.
Ammo so‘nggi yillarda xavfsizlik choralari kuchaytirilgani sababli bunday hodisalar sezilarli darajada kamaygan. Bugungi yong‘in esa bu boradagi muammolarni yana kun tartibiga olib chiqdi.
